NOTE 17/20

الحبس كذّاب والحي يروّح

نحطوا المسألة في إطارها/ وسامحوني كان باش نحكي ع الحبس ع الخوا/شوية زيت زيتونة لازمة باش يتهضم موضوع كيما هذا

في بلادنا 28 حبس/نظريا طاقة الاستيعاب 16 الف سجين /واقعيا فيهم 27ألف

نسبة الإكتظاظ تفوت 150في المائة وتنجم توصل ل200في الميا

حسب المعايير العالمية كل سجين لازم يتوفرلو 4متر مربع

المعايير التونسية ميترو و 57 صم 2 وساعات ما يخلطش على ميترو وسع

3000 سجين في بلادنا من غير سرير رغم أحسن دستور في العالم ورغم حكمة الشيخين 

تخيلو لحظة كيفاش ها 3000 يعديو ليلة في الحبس/ الباهي فيهم مقعمز على سطل

حسب المعايير العالمية 169 سجين على كل 100 ألف ساكن

المعايير التونسية 200 سجين على كل 100 الف ساكن

في دولة كيما ألمانيا نسبة الجرائم إلي يتحكم فيها بالحبس ما تفوتش 5في الميا / 20في الميا عقوبات مادية /خطايا / 75في الميا من الأحكام هي عقوبات بديلة معناها العمل لفائدة المصلحة العامة

مكاتب المصاحبة  la probation  مجعولة لمراقبة ظروف تنفيذ العقوبات البديلة والمتمتعين بالسراح الشرطي

المصاحبة بدات في أنجلترا عام 1790 / وفي امريكا عام 1841

نرجعو ع الأرض/ في تونس بدا العمل بالعقوبات البديلة عام 1999 ويشمل المحكومين باقل من عام حبس ولأول مرة /مبتدئ

اول مكتب مصاحبة في تونس والوحيد لحد الآن هو مكتب سوسة بدا في 23جانفي 2013 ويشرف عليه قاضي تنفيذ العقوبات تحت إشراف الوكيل العام

مكتب فيه 4او 5 مرافقين عدليين /0 ميزانية /كرهبة في سن اليأس عمرها 15 سنة

رئيس المكتب هو قاضي تنفيذ العقوبات/ موش متفرغ /بما انو يرأس دائرة الأحوال الشخصية/ ورغم هذا نائب المدير الإقليمي للمنظمة الدولية للإصلاح الجنائي بالشرق الأوسط وشمال إفريقيا إعتبر مكتب المصاحبة بسوسة افضل مكتب في إفريقيا

زعمة علاش؟

1101 ملف تخدم من عام 2013 شملت المحكومين بالعقوبات البديلة والي تمتعوا بالسراح الشرطي

نسبة العود انخفضت ل 5في المائة

نسبة العود في تونس تفوت 45في الميا/ معناها شطر المرابيط أول مرة  يرجعو للحبس بعد ما يتسيبوا

مع الأسف السادة القضاة في بلادنا ميالين للحكم بالسجن حتى في الجرائم البسيطة/ أخلاق حميدة وعنف خفيف ومخالفات

الحبس في بلادنا فيه كل شي/إلا الإصلاح

كل واحد فينا معرض للسجن /الحبس يدمر حياة اي سجين /يخسر بدنو وإحترامو لنفسو / ويكفر بالبلاد وإلي فيها

في محاكم سوسة ملي بدا العام/ أكثر شهر تحكم فيه بالعقوبات البديلة وصل ل14حكم

بقية الأشهر ساعات 0 أحكام / الحبس ساهل في الكلام/ بابو ديما موارب/ اما التجربة مرة في السانترا والشامبري والسيلون مع الكابران والكراكجية

اليوم تبدا أشغال مائدة حوار وطنية حول العقوبات غير السالبة للحرية في تونس ودور مكاتب المصاحبة والمؤسسات الوطنية

السادة نواب مجلس نواب الشعب /معاليكم حضراتكم/ يبارك فيكم أحضروا أسمعوا وأفهموا وغيروا القوانين

إنتخبناكم تكونوا نواب /بالباء موش بالميم

بدلوا القوانين/  إلزموا القضاة بالحكم بالعقوبات البديلة

وسعوا مجال تدخل قاضي تنفيذ العقوبات في مجال السراح الشرطي

رفعوا في العقوبة القصوى من 8 شهور  لعامين

أعطيو فرصة ثانية للي يغلط

إلي يغلط مرة /نعاونوه يرجع يراجع روحو ويتعلم ويواصل موش ندزوه ونغرقوه وننساوه ومن بعد نحكيو على شباب تونس علاش يحرق وعلاش يدعوش وعلاش ينقم

المشروع في وزارة العدل هو إحداث 6مكاتب مصاحبة جديدة بعد التجربة النموذجية في سوسة : في تونس منوبة بنزرت القيروان المنستير وقابس

عاونوا على تعميم مكاتب المصاحبة في كامل البلاد

حسب تجربة مكتب المصاحبة في سوسة إلي فيها حبس واحد هو المسعدين

السجين يتكلف يوميا في 12550 اكل وماء ونظافة

زيد كلفتو ع الإدارة العامة للسجون ضو وبنية ومازوط واعوان وإدارة 32دينار

وإذا تعرفو انو المتمعين بالعقوبات البديلة يخدمو ساعتين مقابل كل يوم سجن / التكلفة إلي تم توفيرها لفائدة البلاد من شهر جانفي لسبتمبر 2017 هي:

على مستوى حبس المسعدين قرابة 127مليون

الإدارة العامة 315مليون

المؤسسات إلي يخدم فيها المحكوم عليهم من بلديات ومحكمة ومراكز حرس وشرطة وسبيطارات وبرط...قرابة 32مليون إذا حسبنا الساعة السميق 1570

المجموع قرابة 500مليون تم توفيرها في 9شهور في حبس واحد في ولاية سوسة

في شهر واحد سبتمبر 7محكوم عليهم بالعمل لفائدة المصلحة العامة ومتمتعين بالسراح الشرطي وفروا للدولة 20 مليون

إحسبوا وحدكم شنوة تربح الدولة فلوس/ والمجتمع يمنّع أولادو لو تتعمم مكاتب المصاحبة في كامل تونس .....

17/20 لمكتب المصاحبة في سوسة ولقاضي تنفيذ العقوبات إلي يشرف عليه والمرافقين العدليين إلي يخدمو فيه رغم قلة العدد والعتاد

مثال للقضاء إلي يحقق العدالة  وما يكتفيش بتطبيق القوانين

الحبس كذاب والحي يروح / بشرط انو السجين كي يخرج م الحبس يكون حي

بلادنا صعيبة لبرة  وإنت حر / خلي تتسلب منك حريتك ويتسكر عليك باب / وراه يصير ما يصير وما يسمع حد وما يتكلم حد

قانون الصمت هو القاعدة