Note

18/20  لغزال الأطلس

نهاية أكتوبر 2016/رجع غزال الأطلس لسفوح جبل السرج بسيدي حمادة بعد غياب 116 سنة

غزال الأطلس إنقرض من بلادنا بسبب الصيد العشوائي والزحف العمراني

أكتوبر 2016 تم إعادة توطين 43 راس من غزال الأطلس إستقرت في سليانة بين أشجار الفرنان والصنوبر الحلبي والسرول وصقور الشاهين والعقاب

43 غزال قيمتها 130 ألف أورو هدية من برنامج الصداقة الإسباني التونسي

الحديقة الوطنية بجبل السرج محمية تأسست عام 2010 على مساحة 100 هكتار وفي جبل السرج مغارة عين الذهب وحدة من أجمل المغاور في العالم

18/20 لغزال الأطلس إلي رجع لتونس وقت البعض من أولادها هاجج منها / وإلي بفضلو ألغات وزارة الفلاحة نشاط جمعية الدعوة والإصلاح الي يرأسها الحبيب اللوز

نشاط كان مبرمج نهار الأحد 29 أكتوبر

سمير الطيب وزير حنيّن وطيب

خاف على راحة الغزلان الصغيرة من إزعاج نشاط الدعوة والإصلاح/1500 بشر كانوا جايين لجبل السرج"  تشجيعا للسياحة الداخلية" فكان قرار الالغاء

يبدو انو غزلان الاطلس سمعت بالتجمع الاحتجاجي نهار السبت قدام الاتحاد  الجهوي للشغل بسليانة  فعجّلت بالولادة

غزلان الاطلس ما حضرتش احداث الرش 27نوفمبر 2012/ وقتها كانت النهضة تسوق في البلاد/ نهضة الحبيب اللوز  والصادق شورو /لكن صوت ابناء سليانة الغاضبين وصلها"من رشنا ليس منا"

18/20 لغزلان الأاطلس إلي ألغات رحلة إستكشافية كان ناوي ينظمها فضيلة الشيخ الحبيب اللوز ب30د للراس مع تأمين الفطور والغداء

بلاغ الجمعية ما قالش إلي باش يحضرو خبراء في الثروة الحيوانية والنباتية ولكنو أكد على المنشدين المتميزين

جمعية الدعوة والإصلاح بفروعها الجهوية في بر تونس/ عندها باع وذراع

في 15 أكتوبر دورة علمية مجانية في مقاصد الشريعة بالقيروان/ مع مساهمة رمزية ب 10د لإستراحة القهوة / أطرها الوزير السابق نورالدين الخادمي وعبد المجيد النجار عضو مجلس امناء الإتحاد العالمي لعلماء المسلين والقيادي بحركة النهضة وأحد منظريها

في أفريل2017 أكبر حضور بشري في التاريخ المعاصر حسب وصف قناة الزيتونة في مائدة يوغرطة

2500 نساء ورجال وأطفال/ مهرجان كبير"عربون إلتزام بأخلاق الإسلام وأدابو "هكة قال الحبيب اللوز مؤسس جمعية الدعوة والإصلاح "رمز الإعتدال والتفتح والرشد" والكلام للوز /جمعية تراهن ع الأجيال القادمة

18/20 لغزال الأطلس

ومن رشنا ليس منا

COUP DE GUEULE

OTE

آمس 26 أكتوبر إضراب كامل في ديوان التونسيين بالخارج مركزيا وجهويا

مطالب النقابة الأساسية متنوعة : فتح ملفات الفساد في الديوان

منح الأاولوية في خطة ملحق إجتماعي لأبناء الديوان وسد الشغورات

الحقيقة إستغربت كيفاش أولاد ديوان  التونسيين بالخارج غاضبين

19نائب في مجلس نواب الشعب يمثلو التونسيين في الخارج قلت أكيد قلوبهم ترجف ع الديوان وع المليون و300 ألف تونسي إلي عايشين لبرة

السيد وزير الشؤون الإجتماعية

السيد كاتب الدولة المكلف بالهجرة

حلوا الملف حتى حد ما على راسو ريشة

أبناء الديوان من حقهم يحتجوا / التوانسة يحبو يفهمو شنوة إلي صاير من سنوات في ديوان التونسيين بالخارج

كاتب دولة سابق للهجرة جابتو رياح الثورة من الضفة الأخرى للمتوسط بعث طيارة فارغة من تونس باش يجيب وفد م الجالية /شكون حاسبو؟ ولا عندو حصانة ربانية ؟

13مليار دوفيز مخصصة نظريا للتوانسة في الخارج كيفاش تتصرف؟ شكون يراقب؟ وشكون يحاسب ؟

يؤسفني نقلكم الدوسي تكور بيه الرجالة

حتى شيء ما قاعد يتعمل

نظرة سريعة على موقع الديوان OTE.NAT.TN  نظريا ب3لغات الأنجليزية HORS SERVICE  

كل صفحة تتحلها تلقى كلام عام لا معطيات ولا أرقام ولا تواريخ كلو إنشائيات

صفحة الفيسبوك يطلع هاك الصبع الشهير/يبطى شوية

ويني قائمة الملحقين الإجتماعيين 47؟ أمن قومي مخبينها؟

الناس الكل تعرف انها ليستة عليها برشة كلام متاع مجاملات وترضيات وعديني ونعديك ومتاعي ومتاعك /الناس الكل مورطة او متواطئة

ما ثماش تكافؤ فرص ولا منطق الجدارة والتميز والإستحقاق

ما يوصل  كان إلي عندو شكون مكاليه أو موصي عليه

أولادنا لبرة قاعدين يقراو في اللغة العربية ولا يقولولهم إكريو إنتوما المحل على حسابكم وتوة نوفرولكم معلمين ؟

السيد يوسف الشاهد

في أكثر من مناسبة قلت عنا 8000 كفاءة تونسية في الخارج

يؤسفني نقلك غلطوك

حسب منظمة التعاون والتنمية في الميدان الإقتصادي OCDE

93 الف كفاءة تونسية في المهجر

مستشارة في الإليزي رؤساء بلديات رؤساء جامعات أطباء مهندسين ومسيرين إقليميين لكبرى الشركات العالمية وفنانين وكتاب وشعراء وسينمائيين

شكون إهتم بيهم ؟

أبناء الديوان من حقهم يغضبوا ويحتجو ويضربو لأنو حد ما سمعهم

برشة م التوانسة لبرة يحسو أنهم دون سند بلادهم نساتهم/ صورتنا اليوم في الدرك الأسفل إرهابيبين وقتلة

شنوة قاعد يعمل  ديوان التونسيين بالخارج ؟

السيد يوسف الشاهد

المغاربة جاو عام 1993 يتعلمو م التجربة التونسية/ اليوم إحنا وين وهوما وين ؟

المغرب عملت الولاية 13 ولاية إفتراضية خاصة بالمغاربة في الخارج

المغرب خصصت رقم أخضر دولي لتلقي الشكايات بخصوص الخدمات القنصلية

التوانسة لشكون يشكيو ؟ عندهم المولى سبحانو وزوكربارغ

في المغرب مؤسسة الحسن الثاني للمغاربة المقيمين بالخارج ووزارة مكلفة بالهجرة

إلي باش يقلي أحنا البلاد الوحيدة إلي تروح بموتاها على حساب الدولة نجاوبو أعطيونا قدرنا وأحنا أحياء

القبر واحد والرب واحد حتى لو في قاع البحر ...

NOTE 17/20

الحبس كذّاب والحي يروّح

نحطوا المسألة في إطارها/ وسامحوني كان باش نحكي ع الحبس ع الخوا/شوية زيت زيتونة لازمة باش يتهضم موضوع كيما هذا

في بلادنا 28 حبس/نظريا طاقة الاستيعاب 16 الف سجين /واقعيا فيهم 27ألف

نسبة الإكتظاظ تفوت 150في المائة وتنجم توصل ل200في الميا

حسب المعايير العالمية كل سجين لازم يتوفرلو 4متر مربع

المعايير التونسية ميترو و 57 صم 2 وساعات ما يخلطش على ميترو وسع

3000 سجين في بلادنا من غير سرير رغم أحسن دستور في العالم ورغم حكمة الشيخين 

تخيلو لحظة كيفاش ها 3000 يعديو ليلة في الحبس/ الباهي فيهم مقعمز على سطل

حسب المعايير العالمية 169 سجين على كل 100 ألف ساكن

المعايير التونسية 200 سجين على كل 100 الف ساكن

في دولة كيما ألمانيا نسبة الجرائم إلي يتحكم فيها بالحبس ما تفوتش 5في الميا / 20في الميا عقوبات مادية /خطايا / 75في الميا من الأحكام هي عقوبات بديلة معناها العمل لفائدة المصلحة العامة

مكاتب المصاحبة  la probation  مجعولة لمراقبة ظروف تنفيذ العقوبات البديلة والمتمتعين بالسراح الشرطي

المصاحبة بدات في أنجلترا عام 1790 / وفي امريكا عام 1841

نرجعو ع الأرض/ في تونس بدا العمل بالعقوبات البديلة عام 1999 ويشمل المحكومين باقل من عام حبس ولأول مرة /مبتدئ

اول مكتب مصاحبة في تونس والوحيد لحد الآن هو مكتب سوسة بدا في 23جانفي 2013 ويشرف عليه قاضي تنفيذ العقوبات تحت إشراف الوكيل العام

مكتب فيه 4او 5 مرافقين عدليين /0 ميزانية /كرهبة في سن اليأس عمرها 15 سنة

رئيس المكتب هو قاضي تنفيذ العقوبات/ موش متفرغ /بما انو يرأس دائرة الأحوال الشخصية/ ورغم هذا نائب المدير الإقليمي للمنظمة الدولية للإصلاح الجنائي بالشرق الأوسط وشمال إفريقيا إعتبر مكتب المصاحبة بسوسة افضل مكتب في إفريقيا

زعمة علاش؟

1101 ملف تخدم من عام 2013 شملت المحكومين بالعقوبات البديلة والي تمتعوا بالسراح الشرطي

نسبة العود انخفضت ل 5في المائة

نسبة العود في تونس تفوت 45في الميا/ معناها شطر المرابيط أول مرة  يرجعو للحبس بعد ما يتسيبوا

مع الأسف السادة القضاة في بلادنا ميالين للحكم بالسجن حتى في الجرائم البسيطة/ أخلاق حميدة وعنف خفيف ومخالفات

الحبس في بلادنا فيه كل شي/إلا الإصلاح

كل واحد فينا معرض للسجن /الحبس يدمر حياة اي سجين /يخسر بدنو وإحترامو لنفسو / ويكفر بالبلاد وإلي فيها

في محاكم سوسة ملي بدا العام/ أكثر شهر تحكم فيه بالعقوبات البديلة وصل ل14حكم

بقية الأشهر ساعات 0 أحكام / الحبس ساهل في الكلام/ بابو ديما موارب/ اما التجربة مرة في السانترا والشامبري والسيلون مع الكابران والكراكجية

اليوم تبدا أشغال مائدة حوار وطنية حول العقوبات غير السالبة للحرية في تونس ودور مكاتب المصاحبة والمؤسسات الوطنية

السادة نواب مجلس نواب الشعب /معاليكم حضراتكم/ يبارك فيكم أحضروا أسمعوا وأفهموا وغيروا القوانين

إنتخبناكم تكونوا نواب /بالباء موش بالميم

بدلوا القوانين/  إلزموا القضاة بالحكم بالعقوبات البديلة

وسعوا مجال تدخل قاضي تنفيذ العقوبات في مجال السراح الشرطي

رفعوا في العقوبة القصوى من 8 شهور  لعامين

أعطيو فرصة ثانية للي يغلط

إلي يغلط مرة /نعاونوه يرجع يراجع روحو ويتعلم ويواصل موش ندزوه ونغرقوه وننساوه ومن بعد نحكيو على شباب تونس علاش يحرق وعلاش يدعوش وعلاش ينقم

المشروع في وزارة العدل هو إحداث 6مكاتب مصاحبة جديدة بعد التجربة النموذجية في سوسة : في تونس منوبة بنزرت القيروان المنستير وقابس

عاونوا على تعميم مكاتب المصاحبة في كامل البلاد

حسب تجربة مكتب المصاحبة في سوسة إلي فيها حبس واحد هو المسعدين

السجين يتكلف يوميا في 12550 اكل وماء ونظافة

زيد كلفتو ع الإدارة العامة للسجون ضو وبنية ومازوط واعوان وإدارة 32دينار

وإذا تعرفو انو المتمعين بالعقوبات البديلة يخدمو ساعتين مقابل كل يوم سجن / التكلفة إلي تم توفيرها لفائدة البلاد من شهر جانفي لسبتمبر 2017 هي:

على مستوى حبس المسعدين قرابة 127مليون

الإدارة العامة 315مليون

المؤسسات إلي يخدم فيها المحكوم عليهم من بلديات ومحكمة ومراكز حرس وشرطة وسبيطارات وبرط...قرابة 32مليون إذا حسبنا الساعة السميق 1570

المجموع قرابة 500مليون تم توفيرها في 9شهور في حبس واحد في ولاية سوسة

في شهر واحد سبتمبر 7محكوم عليهم بالعمل لفائدة المصلحة العامة ومتمتعين بالسراح الشرطي وفروا للدولة 20 مليون

إحسبوا وحدكم شنوة تربح الدولة فلوس/ والمجتمع يمنّع أولادو لو تتعمم مكاتب المصاحبة في كامل تونس .....

17/20 لمكتب المصاحبة في سوسة ولقاضي تنفيذ العقوبات إلي يشرف عليه والمرافقين العدليين إلي يخدمو فيه رغم قلة العدد والعتاد

مثال للقضاء إلي يحقق العدالة  وما يكتفيش بتطبيق القوانين

الحبس كذاب والحي يروح / بشرط انو السجين كي يخرج م الحبس يكون حي

بلادنا صعيبة لبرة  وإنت حر / خلي تتسلب منك حريتك ويتسكر عليك باب / وراه يصير ما يصير وما يسمع حد وما يتكلم حد

قانون الصمت هو القاعدة 

NOTE 6/20

للي يحلبو في البقرة ...

السبت إلي فات نظم جمهور CAB وقفة إحتجاجية  قدام الشركة التونسية لصناعات التكرير"ستير"

المحتجين مستائين من ضعف الدعم المالي للجمعية/ 100 مليون اكهو

رئيس جمعية اجباء البنزرتي قال"الستير لازم تعمل كيف الشركات في الولايات الأخرى"

الغمزة مقصود بيها فسفاط قفصة وgroupe chimiqueفي قابس

وفي قفصة اصدر نجم المتلوي بلاغ بتاريخ 16 اكتوبر لوحت فيه الهيئة بتعليق نشاط الجمعية /وثمة شكون هدد بإيقاف إنتاج الفسفاط /هي نافسة وكمّل طياب ريحتها

السبب "عدم الإستجابة لمطالبنا المتمثلة أساسا في الدعم المادي للجمعية لتغطية الديون المتخلدة وتسييرها"/ هوني نتسلف الستيلو الأحمر من عند نورالدين الطبوبي ونسطر تحت تغطية الديون

القانون الأساسي للهياكل الرياضية /الفصل6 ينص على أنو تمويل الجمعيات الرياضية اساسا "من مداخيلها الذاتية ومن مساهمات الدولة والجماعات المحلية والمؤسسات العمومية أو المؤسسات الخاصة ومن الإشهار ..."

بالقانون/ من واجب المؤسسات العمومية تاقف مع الجمعيات الرياضية

الفصل 7 ينظم شروط الوقفة

تبعني مختار بما انك تحب الوقفة والوقوف والتوقف

*****************************************************

النادي البنزرتي مطلوب في 153 الف يورو لازم يدفعها للفيفا قبل 31 اكتوبر

بعد ما شكا بالجمعية اكثر من ملاعبي اجنبي /شي من انغولا وشي م الكاميرون

الجمعية مثقلة بديون تفوت المليار

شركة الستير الي وقف قدامها المحتجين عندها عجز 524 مليون دينار /ارقام 2015 والستار ربي قداش وصل توة

groupe chimique عطى للملعب القابسي ومستقبل قابس كامل المنحة ل2017 وسبقلهم من شهر جوان 200 مليون على ميزانية 2018

اكثر من نصف فريق نجم المتلوي منتدبين

الملعب القابسي انتدب السنا 10ملاعبية

المستقبل إنتدب 8

CSS مطالب بدفع نصف مليار للفيفا  خلال 5ايام بسبب شكايات ملاعبية اجانب موش خالصين

الأولمبي الباجي عاقبتو الفيفا بحذف عدد م النقاط من رصيدو ومعرض لخطايا أخرى بسبب مشاكل مع ملاعبية افارقة ومدرب اسباني

النادي الإفريقي مطالب بدفع خطايا للفيفا 1.4مليون دولار

النجم الساحلي مليون و100الف دولار بسبب لاعب ما لعبش دقيقة في ليتوال

المال العام هو فلوسي وفلوسك/ فلوسنا الكل الي تتلم فليس مع فليس:

تنبري السفر، معلوم مضمون ولادة او تعريف بالإمضاء، الزبلة والخروبة Vignette ...

شكون عطا  الحق لمؤسسات عمومية باش تفرني فلوسنا يمين ويسار حتى لو كان المقابل"تضحيات للحفاظ على السلم الإجتماعي"

ويني وزارة شؤون الرياضة والشباب؟ الوزيرة وكاتب الدولة للرياضة إلي ما نشوفو كان مبتسم في الإفتتاحات والإستقبالات ؟

ويني وزارة المالية؟ بانا منطق الملاعبية ما يدفعوش دورو اداءات؟ شنوة؟ ملائكة الرحمان؟

وينهم رؤساء الجامعات الرياضية ؟ ويني أجهزة الدولة المكلفة برقابة التصرف المالي للجمعيات الرياضية؟

متأكدين 20 في المائة مخصصة للشبان؟

علاش ما تعاقب حد؟ ولا تسايسو في رواحكم ؟

6/20 مستحقة للي مسيبين الماء ع البطيخ /حتى لو ج ثمة صابة ، هانا من هزيمة الترجي لطريحة النجم لخيبة الإفريقي /

6/20 لللي مسيبين الما ع البطيخ وللي يهدرو في المال العام من رؤساء جمعيات عندهم كل شي إلا حسن التصرف

كلامي موش باش يعجب/ كالعادة/

الجمعيات الرياضية ماهيش خيرية ولا هي موائد الرحمان ولا سبيل، إلي يحب بفرني يجبد من مكتوبو /

وللي يحتجو يطالبو بحلبان البقرة ، نقلهم

إتهناو ماعاد فيها ما يتحلب وجا الوقت باش نتفطمو الكل على قاعدة

NOTE

20/20

اليوم 23 أكتوبر ذكرى استشهاد سقراط الشارني رئيس فرقة الأبحاث والإستعلامات بسيدي بوزيد

سقراط ماكانش وحدو

كان معاه رئيس فرقة مكافحة الإرهاب عماد الحيزي والملازم الطاهر الشابي والوكيل رضا المناصري والعريف أول محمد المرزوقي والعريف أول أنيس الصالحي

إلي عطاو دمهم من أجل تونس هم أطهرنا وانبلنا وأشرفنا،

شهداء الوطن م المؤسسة الأمنية 42 والعسكرية 69 والأمن الرئاسي 12 والديوانة والسجون لكلهم مقامهم عالي

20/20 ونحني راسي قدر ليهم ومحبة فيهم " أناديكم أشد على أياديكم.. وأبوس الأرض تحت نعالكم وأقول أفديكم"

جماعة 6 زيت، والترجي دولة والإفريقي عقلية/ سامحوني ...

باش نحكي على سقراط لأنو بلادنا محتاجة رموز/ قدوة تحتذى /في زمن ولى فيه الكناترية والغبارة والحراقة   قادة رأي وعندهم مريدين ومتحدثين باسمهم .

نحكي على سقراط الشارني وخايف ما نوفيشي حقو

عيب ثمة شكون يختزل سيرتو في أنو أختو وزيرة

سقراط خويا وخوك/ إنت يلي تسمع في

سقراط هو الوليد إلي يحبو كل بو وتتمناه كل ام وتنجم تحلم بيه أي طفلة

قريد العش ودلول الدار، تولد في بنزرت في ذكرى الجلاء ، وخذا الباك ب18معدل في الكاف وإختار الأكاديمية العسكرية كيما بوه

تخرج في 30جوان 2008 مهندس علوم تطبيقية في الأسلحة

خدم في نفطة رئيس فرقة الحدود /وقت صارت الثورة ما خرجتش كرتوشة من عندو ضد المحتجين / موقف خلى ابناء نفطة يبعثو برقية شكر لعروفاتو ويطالبو ببقاؤو

من نفطة تعين سقراط في مارث رئيس فرقة الحدود وغادي تصدى اكثر من مرة لوشواشة امير الكنترا

ترقى لخطة رئيس فرقة الاستعلامات والأبحاث بقبلي ، ولى اصغر رئيس فرقة في تونس

شهود عيان يحكيو انو وقت زار علي العريض قبلي قال لسقراط اول ما شافو: صار إنت هو؟  أخيرا شفناك/ إسمك ديما سابقك

في 2012 تعين سقراط  في سيدي بوزيد QUARTIER GENERAL متاع الخطيب الإدريسي وأبو عياض ولقمان ابو صخر

سقراط هو اول من دخل للجامع باش يلقي القبض على الإمام الإرهابي خليفة القراوي واحد من قدماء مجموعة سليمان  إلي دفن الأسلحة تحت المنبر

في 23 اكتوبر إستشهد سقراط

سقراط ينجم يكون ولدك/ خوك/ زوجك/ صديقك/ حبيبك /جارك

مات سقراط ومشات معاه حلماتو الصغيرة/ يحكي عليها  وهو ياكل في ظوافرو بدم بارد

يحجج والديه

يعرس ويجيب بنية ويسميها سيرين

علاش لا؟  ما يوليش وزير داخلية او حتى رئيس دولة

هكة كان يحلم سقراط

مات سقراط وفي قلبو محبة النادي الإفريقي

مات سقراط / أما إسمو ديما سابقو

سقراط ما كانش طاغوت

 حتى واحد من لولاد ماكان طاغوت

لا عماد ولا  الطاهر ولا رضا ولا محمد ولا انيس

حبوكم حتى الموت

 حبونا اكثر ملي حبيناهم

عطاونا حياتهم

 واحنا شنوة عطيناهم ؟

20/20 ليهم ونسكت خير ....

                                                                                                                            

السيد الرئيس : لا نطلب منك سوى شيء من الحزن ؟ فهل هذا كثير

فجعت الجزائر بسقوط طائرة عسكرية شمال شرقي البلاد أودى بحياة 76 عسكريا

وقد أعلن الرئيس الجزائري بوتفليقة الحداد ثلاثة ايام بداية من الأربعاء 12فيفري

حدث جلل مثل هذا يجدّ بالقرب منا وعلى حدودنا وفي بلد تجمعنا به علاقات الدم والمصاهرة والإخاء الحقيقي - ومن زار الجزائر وعرف أهلها المحبين لتونس يدرك ذلك جيدا -  ورئيسنا يلازم الصمت وكأن الطائرة سقطت في جبال الهمالايا ؟

سيدي الرئيس، ألست أنت من إستقبل الوزير الأول الجزائري قبل أربعة أيام ؟ ألست أنت من تحدث عن" السعي إلى دفع العلاقات بين البلدين إلى مستوى إستراتيجي تجسيدا للعلاقة التاريخية والأخوية التي تجمع الشعبين الشقيقين؟ "

السيد الرئيس، هذا الكلام نشرته دائرة الإعلام والتواصل المنتصبة بقصر قرطاج على موقع الرئاسة ولست انا من أبدعه؟

السيد الرئيس، عذرا ولكن أي علاقات إستراتيجية هذه التي  ستبنيها ولم يرفّ لك جفن بعد مقتل 76 جزائريا كانوا يحلقون في أعالي الجبال حماية لأمن بلادهم وامن تونس؟

السيد الرئيس يا إبن الجنوب حيث قيم القبيلة والعشيرة وخصال الكرم والشجاعة والإيثار، هل هكذا علاقات الجوار بين أبناء العشيرة الواحدة؟ أليست الجزائر هي الظهر الذي نحتمي به؟ هل كثير على الجزائر الشقيقة أن نحزن لحزنها ؟

إننا لا نطلب منك الشيء الكثير ...لا شيء غير بعض الحزن الذي يليق بالإخوة والأصدقاء ... لا شيء غير ذلك ، فهل ترانا نطلب الكثير؟

خبايا خطاب عيد الثورة: لماذا قال الرئيس المرزوقي" لن اسلم السلطة إلا لرئيس ينتخبه الشعب؟"

مرّت الذكرى الثالثة لـ14جانفي وخلّف خطاب الرئيس المؤقت بهذه المناسبة جدلا واسعا، فقد  بدا المرزوقي متوترا وهو يتحدث عن إنقلاب مفترض تعرض له في" ذلك الصيف المشؤوم"  وبلهجة حادة قال إنه لن يسلم الكرسي إلا إلى رئيس منتخب من طرف الشعب التونسي،  فما الذي دفع المرزوقي إلى هذا القول والتأكيد عليه؟ ولماذا إشترط ان يكون الرئيس منتخبا من الشعب علما وانه وصل إلى قصر قرطاج بفضل توافق الترويكا في ما بينها ولم يكن للشعب أي دخل في اختياره رئيسا للجمهورية بعد  إنتخابات 23 اكتوبر 2011 ؟